Deilig å sjå Heiberg naken

Påstand: IOC har overraskande lenge klart å glatte over at OL i Sotsji er ei menneskerettskatastrofe. Amnesty har stått i kroken og peikt på alt Russland gjer: Mot homofile. Mot journalistar som Anna Politkovskaya. Mot folk som er kritiske. Men det generelle raseriet over IOC sin mangel på etikk mangla ein nøkkel. Eit siste drops som skulle få godteposen til å revne.

Forresten, den setninga der, der eg sa namnet Anna Politkovskaya i ein Dagbladet-artikkel? Den gjer at eg berre kan gløyme å sleppe inn i Russland igjen. Og om eg slepper inn, så er det alltid ein liten sjanse for (påstår folk eg har spurt) at politiet finn våpen eller dop i bagasjen min, og svosj på besøk i russisk fengsel med meg. Russiske fengsel er ein stad der til dømes jentene frå Pussy Riot måtte vaginalundersøkast kvar dag i to veker.

I tillegg er det den stille aksepten: Aksepten av at «ukontrollerbare» ungdomsgjengar tilfeldigvis bankar opp fiendar av staten. Aksepten av at demonstrantar som les brev frå russiske fangar på gata, vert låst inne i timevis berre for å skremme dei. Aksepten av at tusenvis av menneske i Sotsji vart kasta ut av heimen sin utan erstatning. Aksepten av påstanden om at homofili er det same som pedofili. Akkurat dette siste vil eg ta litt tak i. For eg har møtt det i samtale med folk i Noreg også. Og det er ikkje sånn at Russland er ein annan planet enn Noreg. Eg har merka ein smak av denne tanken hos vaksne, tilsynelatande oppegåande folk. Trur du ikkje på det? Ok, forklar meg igjen kvifor homofile par ikkje får lov å adoptere born frå utlandet. Forklar meg kvifor ein barneheim i (fyll inn det landet du har mest fordommar mot her) er betre enn ei homoleilighet på Frogner. Det at «Lommemannen» klarte å komme seg ut av overgripar-adferd ved å akseptere at han er bifil, fungerte som vann på mølla for fyren eg prata med. Det var ikkje sånn at eg klarte å vinne den samtalen, men eg meiner jo det er bakvendt.