Ben og Noel Haggard, tek med seg pappa Merle Haggard sitt vidkjende backingband, The Strangers, til Breim.

– Tidenes countrytreff-program

Norsk Countrytreff har lansert årets komplette festivalprogram, og arrangørane er stolte over spennvidda av artistar for årets festival. Det er artistar frå dei lokale gutane i Yngvar Furebotn Band, til dei «internasjonale gutta» i Ben & Noel Haggard, med legendariske The Strangers.

Geografisk får Countrytreffet musikalsk besøk frå Nordland til Aust-Agder, og frå California til Hedmark.

– Vi i Norsk Countrytreff gjer alt vi kan for å famne vidt – både artistmessig og publikumsmessig. Vi tilbyr countrymusikk for alle, frå dei aller minste i barnehagen til dei aller eldste i kommunen. Frå sentrumskonsertar og kyrkjekonsert til intimkonsert i Frislidlada, fortel leiar Arve Kleppe i Norsk Countrytreff.

Alt dette kjem i tillegg til det som skal skje på arenaen på Norsk Fjordhestgard under Norsk Countrytreff.

Landet rundt
Av lokale band frå Sogn og Fjordane kjem Yngvar Furebotn Band, med bandmedlemmar frå Brekke, Førde og Jølster. Frå Lærdal kjem våre musikalske vener i Longhorn.

Hordaland er representert med Sons of Vanity, Dagland og Gunslingers, medan Hedmark og Møre og Romsdal stiller med høvesvis Bo Outlaw & Twang Depot og Vassendgutane. Nordland kan skilte med Girls Gone Country.

Frå Aust-Agder kjem både G. Thomas og Steffen Jakobsen for å underhalde, og frå Oppland tek Get Rhythm og Staut turen.

– Og for dei som saknar trøndersk palatalisering så har vi fått nedover både bluegrassbandet Bare Fjas & Smågras og dei gamle countryheltane i Too Far Gone frå Sør-Trøndelag, fortel Kleppe.

Den største leverandøren av musikalsk velvære i år, står Oslo for. Med Lucky Lips, Country Heroes, Jack Stillwater og Darling West, stiller hovudstaden med eit firkløver av band med solide merittar.

Sterk liste

– Vi har 18 norske band, der somme står fram som nokre av dei beste i sin sjanger, både nasjonalt og internasjonalt, seier Kleppe og listar opp.

Darling West med sine ni opptredenar på South By South West (SXSW) i 2017 og Spellemannspris for beste countryalbum i 2016,

Jack Stillwater med to låtar i storfilmen Kings Bay og så mange topplasseringar på Best Off 2016-lister at vi måtte skrevet ei eiga pressemelding om det,

Vassendgutane med sine doble platina-sal,

Lucky Lips med terningkast fem for «Coming Home» og «The best bluegrass band in Europe»-tittelen framleis hengande rundt halsen, som ei påminning om storslått musikalsk kvalitet,

Country Heroes med ståande ovasjonar frå country-guru Tom Skjeklesæther, Steffen Jakobsen med sitt ”Beste Idol-øyeblikk 2013”. The list goes on and on.

Frå «over there»
USA har også fått lov å bidra på årets countrytreff, og her er bluegrassbrødrene The Crowe Brothers’ frå Clayton Georgia, den unge og framstormande SoCal-artisten Sam Outlaw frå Sør-Dakota.

– Sjølvaste rosina i pølsa må verte Ben & Noel Haggard, som har med pappa Merle Haggard sitt berømte backingband, The Strangers. Dei kjem over frå Bakersfield California, fortel Kleppe.

– Oppsummert vågar vi påstanden om at Norsk Countrytreff i 2017 har truffe alle som føler at dei har eit tilhøve til country, enten det er i form av bluegrass, folk, americana, outlaw, SoCal, festcountry, norsk country, honky-tonk, roots, folkrock, rockabilly, countryrock, outlaw – og country.