Aarvik fekk pris for «Moment»

Under byggindustrien/bygg.no sin årskonferanse på Ullevål Stadion tysdag kveld blei Norgeshus Byggmester Kjell Aarvik AS tildelt prisen for å ha bygd årets småhusprosjekt.

– Prosjektet må framstå for næringa som eit forbildeprosjekt innan flest mogleg av desse kvalitetane; standardisering, byggekostnader, energi og klima, særpreg og nyskaping, bokvalitet (byggeskikk/arkitektur, planløysing og brukbarheit, inneklima) og bruk av BIM, heiter det i nomineringa.

– Skikkeleg gøy

Prosjektet var det første i Noreg i sitt slag. Det særeigne huset svevar på ei søyle, på ei høgde i Halhjemsmarka og blir kalla for Noregs råaste kataloghus.

Les òg:

• Her heng Noregs første Moment-hus
• Noregs første nettopp ferdig
• Selt på første visning - til rekordpris!

– Takk, dette var skikkeleg gøy, seier dagleg leiar Bjarte Aarvik i Byggmester Kjell Aarvik AS, som trekk fram bruken av BIM som ei av grunngjevingane til at dei fekk prisen.

Lokale leverandørar

Til bygginga av det første Momenthuset i Noreg, nytta Byggmester Kjell Aarvik AS i tillegg til dei sentrale leverandørar fleire lokale som Grunn og Betong, Betongentreprenør Sveinung Borgen, Murmester Kjell Røttingen og Osøren Gulvstøp til Sperrevik Elektro, Sverre Samdal Rørleggerforretning, Malermester Terje Kvittingen, Johs Sælen, Fløysand Tak og Os Blikk & Fasade.

Dette er BIM

I følgje Wikipedia er BIM (Bygningsinformasjonsmodellering, building information modeling) det ein kallar digitale modellar av eit bygg. BIM er meint som kjernen i ein samarbeidsmodell mellom dei ulike aktørane, til dømes byggherre, ulike entreprenørar og fag, som elektrikar og røyrleggar, vedlikehaldarar og offentleg mynde både under sjølve byggeprosessen, men òg seinare gjennom heile bygget si levetid til og med eventuell riving og gjenvinning av materialer.