Kulturstipend til Erling og Anne Goro

I forkant av konserten med Sondre Lerche i Oseana laurdag kveld fekk ordførar Marie Bruarøy gleda av å dela ut Os kommune sine to kulturstipend.

Erling Holst Øyaseter og Anne Goro Trondsmo Haugland fekk kvart sitt stipend på 20 000 kroner.

Godt å bli sett

Dei to stipendmottakarane satte naturleg nok stor pris på tildelinga.

– Det betyr veldig mykje. Ikkje minst det å bli lagt merke til, kommenterte dei to rett etter utdelinga.

– Det er mykje utgifter knytt til trening og samlingar, så disse pengane kjem godt med, fortel Øyasæter som jobbar for å koma inn på rolandslaget og gjennom det få moglegheiten til å kvalifisera seg til OL i Tokyo i 2020.

– For meg gir dette meg moglegheit til å frigjera litt tid til å jobba med ting som ikkje er ferdig utvikla. 20 000 kroner er faktisk ein pen slump med pengar om dei blir rett brukt, supplerar Tronsmo Haugland, som er musikar, komponist og nyleg utdanna dansekunstnar/koreograf, busatt på Haugland, kor ho er involvert i produksjonen til Studio O, mellom anna i forestillinga «Fremmed Fugl, Storm og Kaffe» som har premiere søndag ettermiddag.

Viktig å sjå talenta

Ordførar Marie Bruarøy poengterer at det frå kommunen si side er eit poeng å gje kulturstipenda til unge framadstormande osingar.

– Vi freister å heidre talenta tidleg. Det er for seint for oss som kommune å komma den dagen de har vunne OL-medalje, eller satt opp ei stor forestilling på ei av dei store scenen ute i verda. Eg håper dette kan vera med å hjelpe dykk eit lite stykke på den vegen.