Rocka påske for Eirik

– Johnny Cash er min favoritt når det kjem til country, seier Eirik Søfteland.

Sju Idol-finalistar står igjen og fredag er det sending igjen etter at deltakarane har hatt påskeferie.

Country er tema og Søfteland har valt låta (Ghost) Riders in the sky. 

Høyr originalen på YouTube.

– Dette gler eg meg til! seier Eirik, som nesten kan lova at han skal gå med cowboyhatt fredag kveld.

Dette skal finalistane synga fredag:
Astrid Smeplass (16) frå Rennebu: "Mama's broken heart" (Miranda Lambert)
Astrid Sugaren (17) frå Tolga: "The lion's roar" (First Aid Kit)
Eirik Søfteland (24) frå Bergen: "(Ghost) Riders in the sky" (Johnny Cash)
Georg Lipai (17) frå Loen: "Days go by" (Keith Urban)
Siri Vølstad Jensen (17) frå Ålgård: "You'll never leave Harlan alive" (Brad Paisley)
Steffen Jakobsen (23) frå Grimstad: "Ladies love country boys" (Trace Adkins)
Sverre Eide (18) frå Ålesund: "I like it, I love it" (Tim McGraw)

Mottatt som ein helt i Haugesund

Etter å ha tatt seg vidare med ei Kate Bush-låt fredagen før påskeferien reiste Eirik til Haugesund, der han og KingCalling skulle ha varma opp for Jorn Lande.

Oppdraget blei avlyst grunna sjukdom i familien til ein i bandet, men Eirik og kameraten Torodd Rimstad reiste likevel.

– Eg tok to coverlåtar med Mind Crime, som sto for oppvarminga, og det var kjempestemning. Å vera backstage meg Jorn Lande med band, som blant anna inkluderer bassist og gitarist frå Wig Wam, var også veldig interessant, synest Eirik.

Medan vi i Os er vant med å treffa musikaren Søfteland blei det ein meir spontan reaksjon på feststemte folk i Haugesund.

– Det tok litt av, ikkje minst då eg skulle ut og kjøpa meg litt nattmat etter konserten. På fem minutt samla det seg sikkert 25 stykker rundt meg som ville ta bilde, ha autograf eller berre slå av ein prat.

Hyttetur og turbo i Førde

Etter palmehelga blei det ny tur til Oslo, for å filma litt med TV2, og så tilbake til Os for å pakka til hyttetur med festivalfamilien (Rock N LOL) Lindborg.

– Vi hadde nokre deilige avslappande dagar i Masfjorden, med badestamp og luftgevær-skyting, fortel Eirik.

Men påskeaftan var det jobb igjen.

– Då var eg med som vokalist med Turbostipend i Førde. Også der var det bra stemning og ein del Idol-fokus, så eg har kanskje fått meg ein liten ekstra heiegjeng eller to på Vestlandet i påsken.

Frå 10. til 2. plass

Betsson, som i starten tippa Eirik som førstemann ut av finalerundane, har no osingen på 2. plass.

Vinnaroddsen ser no sånn ut:
Astrid Smeplass 2.25
Erik Søfteland 4.50
Steffen Jakobsen 5.00
Siri Vølstad Jensen 6.00
Astrid Sugaren 7.00
Sverre Eide 12.00
Georg Lipai 20.00