Det verdskjende Munch-måleriet blei seld for rekordhøge 120 millionar dollar på Sotheby`s-auksjonen i New York i starten av mai.
Avisa Wall Street Journal opplyser onsdag kveld at den amerikanske forretningsmannen Leon Black er mannen som punga ut svimlande 689 millionar norske kroner for Skrik etter ein dramatisk 12 minutt lang bodrunde.
Måleriet av den norske kunstnaren er det dyraste måleriet som nokosinne er seld på auksjon.
Black er største partnaren i firmaet Apollo Global Management, som han sjølv var med på å starta i 1990. Han skal vera god for 3,2 milliardar dollar, eller om lag 19,6 milliardar norske kroner (mars 2012).
Den kunstglade forretningsmannen er følgjeleg rangert som den 107. rikaste personen i USA, og som den 330 rikaste i verda av Forbes Magazine.
Kunstsamling verd 750 millionar dollar
61-åringen er ein samlar, og sit i styret til The Metropolitan Museum of Art i New York. Han har studert kunst ved Dartmouth College og og forretningsleiing ved Harvard-universitetet.
Kunstsamlinga til Black er verd 750 millionar dollar, og det vidgjetne Skrik-måleriet hamnar i godt selskap. Samlinga til Black inneheld nemleg verk av Raphael, Vincent van Gogh, J.M.W. Turner og Pablo Picasso, blant andre.
For tre år sidan kjøpte Black teikninga «Head of a Muse» av Raphael for rekordhøge 57, 6 millionar dollar.