Fjerde dag med børsfall, men Equinor-satsing sende Scatec Solar til himmels

Det er fjerde dagen på rad at hovudindeksen på Oslo Børs avsluttar dagen med nedgang. Aksjekursane til mange av dei største selskapa til indeksen - som DNB (-0,7), Telenor (-1,3) og Marine Harvest (-1,8) - svekte seg torsdag.

Då hjelper det lite at det aller største av dei, Equinor (+0,4), bidrog til at Scatec Solar la på seg heile 12,4 prosent ved å kunngjere at det kjøper seg opp til ein eigardel på rundt 10 prosent i solenergiselskapet. Investeringa skal bidra til å styrkje Equinors stilling i fornybarsektoren og supplere porteføljen til konsernet med solenergi - som ledd i strategien for å utvikle Equinor til eit breitt energiselskap, ifølgje kunngjeringa.

Scatec Solar er for ein børsmygg å rekne samanlikna med dei store konserna og evna ikkje å trekkje hovudindeksen over nullstreken, sjølv om det vart den desiderte vinnaren på torsdag. Gaming Innovation Group (+6,6 prosent) og Frontline (+4,5) vart nummer 2 og 3 på vinnarlista.

Scatec Solar vart òg det meste omsette selskapet på torsdag, følgd av Equinor og Marine Harvest.

Også på dei tonegivande børsane i Europa enda det med raude tal torsdag. DAX 30 i Frankfurt var ned 1,1 prosent, CAC 40 i Paris fall med 1,3 prosent og FTSE 100 avslutta dagen med eit fall på 0,7 prosent.

Eit fat nordsjøolje vart torsdag ettermiddag omsett for drygt 67 dollar - 2 prosent meir enn ved midnatt.

(©NPK)

Illustrasjonsfoto: Erik Johansen / NTB scanpix