Oslo Børs fall etter tre dagar med opptur
Etter tre dagars fest på Oslo Børs var det slutt. Hovudindeksen som har auka over tre prosent sidan måndag, fall torsdag 0,75 prosent til 852,67 poeng.
Det vart omsett aksjar og eigenkapitalbevis for 4,3 milliardar kroner fordelt på 121.000 handlar torsdag.
Equinor toppa som vanleg omsetningslista med ein handel på 473 millionar kroner og enda med eit fall på 1,2 prosent. Aker BP auka 0,9 prosent.
Vinnaren blant dei mest omsette vart Kongsberg Gruppen som fekk ein kursvekst på 2,6 prosent av ei omsetning på 350 millionar kroner.
Norsk Hydro fall 2,2 prosent, Yara 1,1 prosent og Telenor hadde eit fall på 1,3 prosent.
Flyselskapet Norwegian vart taparen med eit fall på 6,8 prosent. Fallet kjem etter eit fall på 3,6 prosent onsdag. Sidan nyttår har Norwegian-aksjen svekt seg vel 42 prosent.
På dei toneangivande børsane i Europa var bildet blanda. FTSE 100 i London steig 0,2 prosent. DAX 30 i Frankfurt fall 0,6 prosent, mens CAC 40 i Paris stod på staden kvil. I USA fell Dow Jones 0,6 prosent og Nasdaq 0,3 prosent etter dårlege tal for amerikansk detaljhandel.
Då Oslo Børs stengde, kosta eit fat nordsjøolje 64,1 dollar på spotmarknaden, ein vekst på 20 cent sidan onsdag ettermiddag. Prisen på amerikansk lettolje var torsdag ettermiddag 53,9 dollar fatet, det same som dagen før.
(©NPK)
Etter tre dagars opptur enda børsen litt ned torsdag. Foto: Erik Johansen / NTB scanpix