0-1 14. minutt: Martin Ramsland breisidar ballen opp i det venstre hjørnet på nydeleg vis! Ballen vert vippa i bakrommet mot Bendik Bye som får tatt med seg ballen ved sida av ein passiv Rosted. Han slår lågt inn framfor mål der Ramsland får stå veldig ålene. På sitt første touch breisidar han ballen opp i det venstre hjørnet på lekkert vis!

1-1 30. minutt: Sigurd Rosted stangar inn utlikninga for Sarpsborg 08. Hjørnespark frå Lindberg er godt slått, og inne i feltet knusar Rosted Psyché i duellen. Midtstopparen headar ballen rett i hovudet på Grodås før den går inn i nettet bak ein utspelt Dyngeland.

2-1 55. minutt: Kristoffer Zachariassen sender Sarpsborg 08 opp i føringa. Vertane småspelar på venstrekanten før Lindberg trekker seg innover. Han løftar ballen mot Patrick Mortensen, som stoppar opp på sekstenmetersstreken før han ser at Zachariassen har tatt løpet inn i feltet. Dansken slår ei kort pasning mot midtbanespelaren som trekker seg innover i feltet før han set ballen tilbake i hjørnet han kom frå. Dyngeland står stille, og må sjå at ballen trillar inn i nettet bak han.

3-1 65. minutt: Sigurd Rosted med sitt andre for kvelden. Frispark frå Jonas Lindberg er godt slått, og inne i feltet ragar Rosted høgast nok ein gong. Denne gongen styrer han ballen tilbake i det venstre hjørnet bak Dyngeland som blir ståande på feil fot.

Frå Manchester til Sogndal-debut

Søndag kveld vil Eirik Bakke venteleg bruke sin nye spelar, Chidiebere Nwakali, i bortekampen mot Sarpsborg 08. «Chiddi» er i Sogndal på lån frå Manchester City, og det er venta at han vil kunne gå inn på laget som venstre kantspelar.

– Han har stort sett vore god på treningane, og ingen tvil om at det er mykje spennande i han. Samstundes må han lære seg å innordne seg den norske spelestilen, seier Bakke om spelaren som scora to mål for moderlandet Nigeria då dei vann U17 VM for tre sesongar sidan. Etter denne meisterskapen vart han henta til Manchester City og Etihad stadion, men der han fekk lite speltid. Det same var tilfelle då han var lånt ut til klubbane Malaga og Girona. I fjor vart han lånt ut til Start, og fekk eliteseriedebut mot Viking 2. april. Truleg på same dag som han vil få sin debut for Sogndal.

Kampen mellom Sarpsborg 08 og Sogndal kan du følge minutt for minutt i Firda-liven.

Bakke mot Bakke

Oppgjeret mot Sarpsborg 08 kan godt bli ein stillingskrig frå starten av, og to lag som ikkje tek for mange sjansar offensivt.

– Sarpsborg 08 er eit godt lag, og imponerte mange i fjor. Trenar Geir Bakke har fått mykje ut av mannskapet, så eg ventar ein tøff og vanskeleg bortekamp, seier Eirik Bakke om sin namnebror på trenarbenken til heimelaget.

Laget frå Sarpsborg har styrkt stallen med to nye spelarar i det siste, då både Erton Fejzullah og Krepin Diatta har signert for klubben. Begge desse spelarane er klarert frå Norges Fotballforbund, og kan begge spele i kveld. Den nye Sogndal-stopparen Walid Atta er derimot ikkje speleklar i kveld.

Tilbake i klubben

For Sogndal er det dessutan gjensyn med tidlegare Sogndal-spelar Ole Jørgen Halvorsen, som er tilbake i Østfold etter nokre sesongar i Odd Grenland og Bodø/Glimt.

– Etter ein god fjorårssesong, og med lokale spelarar som Ole Jørgen Halvorsen og Joackim Jørgensen tilbake, er interessa aukande i byen, seier salssjef Alexander Klausen til Sarpsborg Arbeiderblad.

Klubben har selt over 2600 sesongkort, og det er forventa godt over 3000 tilskodarar når Sogndal kjem til byen søndag kveld.