USA ser ikkje ut til å ta sin del av klimakutta. I går kveld blei det klart at president Donald Trump trekk USA ut av Parisavtalen.
Mange reagerer. Mellom anna leiar ved Bjerknessenteret for klimaforsking, Tore Furevik.
– Det at eit av verdas leiande land trekk seg ut av ein avtale som i utgangspunktet skulle vera bindande for alle land i verda, er ein veldig uheldig ting.
Kva effekt dette får for andre land, er vanskeleg å spå, meiner Furevik.
– Men ein kan jo tenka seg at andre land vil følga etter USA og trekka seg ut, eller at andre land vil ha mindre motivasjon for å ta dei utsleppskutta som er lova, seier Furevik.
– Avtalen står svakare utan USA
Det ligg i Parisavtalen at landa skulle møtast kvart femte år for stramma endå meir inn på utsleppa.
– Situasjonen har ein veldig uheldig effekt på heile avtalen og den globale klimasituasjonen, meiner klimasenterleiaren.
– Det er klart at avtalen står svakare. Kor mykje svakare ho står, det vil jo vera avhengig av korleis andre land vil reagera.
Ein har allereie sett at Kina og Europa står fast ved avtalen, og kjem til å fortsetta med uforminska styrke.
– Me kan jo òg då tenka oss ein motsett effekt, at dei andre landa tar enno større ansvar enn det elles ville gjort, seier Furevik.
– Ikkje meir urettferdig for USA
Trump meiner Parisavtalen straffar amerikansk økonomi og arbeidsliv.
– Det er jobben min å forsvara USA og landets innbyggjarar, og derfor vil me trekka oss frå Parisavtalen, sa Trump i går.
– Avtalen er ikkje meir urettferdig for USA enn for Noreg og alle andre rike land, seier Furevik ved Bjerknessenteret.
Det grøne klimafondet – der rike land skal bidra til redusert klimautslepp i fattige land – skal vera ein økonomisk fordeling av utgiftene.
– Og då er det klart at rike land må ta større byrde enn fattige land.