Det vekte stor merksemd då forskarar nyleg fann over 30 plastposar og store mengder mikroplast i magesekken til ein død kval.
Fredag gjekk Sissel Arhaug Basso tur i fjøra rett nedom huset på Giske, og samla i løpet av kort tid ein søppelsekk full.
– Der er alt frå kaffiglas, til vanlege plastposar, kakeboksar og pølsepakkar, seier ho.
– Brukte fem minutt på å fylle ein sekk i fjøra på Skjong på Valderøya, skriv Grethe Nordstrand til NRK laurdag formiddag.
Trur folk treng påminning
Fredag kveld la Basso ut eit bilde av plasten ho fann på Facebook, og bad vener og kjende som har lyst å gjere som henne, om å dele bildet.
– Eg trur folk vil bidra og treng ei lita påminning, seier ho og fortel at nyheita om kvalen med plasten i magen var ein ny vekkjar for henne sjølv.
Les også:
Meir plast enn fisk i havet
Søppelet i havet er eit stadig aukande problem og i 2050 ventar forskarar å finne meir plast enn fisk i havet, viser ein rapport frå stiftinga Verdas økonomiske forum.
Havforskingsinstituttet melde fredag at det er funne store mengder plast i havet, og spesielt utanfor kysten vest for Ålesund.
Søppelet får store konsekvensar for det marine livet.
Les også:
Fleire skal ut i helga
Innlegget til Sissel Arhaug Basso har fått mange likes og kommentarar på Facebook, og fleire har allereie sagt dei vil følgje oppfordringa om å vere med å samle plast i helga. Det syns Basso er flott.
No håper ho at ikkje berre hundeeigarane gjer det til ein vane å ha ein plastpose i lomma på tur.
– Også eg kan bli flinkare til å ta med ein vanleg plastpose når eg går på tur, slik at eg kan gjere litt heile tida. Det skal ikkje så mykje til dersom alle bidrar litt, seier ho.