Varmerekordane gir lågare sydensal

Strendene er fulle og forklaringa er enkel: Sommaren 2014 er av den verkeleg varme sorten.

I Møre og Romsdal er det den varmaste på ti år. Då er det mange som ikkje reiser til Syden.

– Det er vits i det no. Det er så fint heime, bortasta pengar, seier Therese Sortehaug.

Ho er éi av mange som vel norske badestrender i solsteika.

Ikkje betre i Tyrkia

For Maria Farstad er vêret i Noreg det same som ho opplevde når ho faktisk reiste på ferie.

– Eg synest det er finast å vere heime. Og vi har faktisk hatt same temperaturane her som vi hadde første veka i Tyrkia, fortel ho til NRK.

Varme i Noreg er kjærkome for dei fleste, men norske reisebyrå merkar at restplassar ikkje blir selt.

– Heilt anna utval enn før

Kristina Johannessen er seljar i Ticket og fortel om langt rolegare dagar i år samanlikna med i fjor.

– Då hadde vi langt større pågang frå dei som måtte ha sol og varme, seier ho.

I år har vi blitt skjemde bort med sol og fint vêr heime. Då er tilbodet eit heilt anna i restplass-marknaden.

– Det er fleire enn tidlegare og eit heilt anna utval enn før. Før har det vore få plassar, medan det no ofte er mange plassar, opplyser Johannessen.

Trur på brutal straff

I Molde og på Nordmøre står badegjestane i kø med varmerekord.

– Eg har ikkje bada så mykje som no før, smiler Isabel Trustrup.

Smil i sola kjem derimot ikkje til å gå ustraffa, trur dei badande.

– Det er berre å nyte det, for dette får vi svi for, trur Therese Sortehaug.

– Vi kjem no til å bli straffa for det etter kvart, trur Yngve Strand.