– Det vi prøver å finne ut er kor torsken inne i fjorden gyt hen. Då køyrer vi denne håven ned på 50 meters djup, trekk den opp igjen og forhåpentlegvis er det ein del egg frå fisk oppi her. Det er det vi er på utkik etter, seier forskar Sigurd Espeland ved Havforskingsinstituttet.
Berre førre veke blei det samla inn rundt 5.500 egg og larvar i området mellom Ålesund og Molde. I nokre fjordar, som i Ellingsøyfjorden, fann forskarane langt fleire egg og larvar enn i den nærliggjande Grytafjorden.
– Alle desse gytefelta som ingen visste om før, og som ein ikkje har hatt moglegheit til å ta omsyn til før. No har vi fått dei ned på eit kart og då kan ein gjere vurderingar når ein skal gjere ting i kystsona, seier Espeland til NRK.
Målet med kartlegginga, bestilt av Nærings- og fiskeridepartementet, er å bevare dei lokale bestandane med kysttorsk. Møre og Romsdal er nest sist ut, berre Finnmark står att.
Forskar Sigurd Espeland ved Havforskingsinstituttet.
Foto: Jannicke Susann Farstad / NRK
