Ettersom 31 av dei 32 laga i dei to øvste divisjonane slapp gjennom første runde, er det duka for fleire «cupsets» i runden som går onsdag og torsdag denne veka.
NRK sender 18 av kampane direkte.
Som i første runde skal alle eliteserieklubbane spele borte. Og det er her dei største overraskingane kan kome.
Tynset - Rosenborg:
MÅLFEST: Rosenborg besøkte Tynset også i 2008, og vann 11-0. Her er det Marek Sapara som scorar
Foto: Thomas Rasmus Skaug / NTB scanpixSiste cupmøte var i 1. runde i 2008. Den gongen vann Rosenborg 11-0. Tidlegare vann RBK 4-1 i 1979 (på Lerkendal) og 3-0 i 1975. Sist Rosenborg rauk ut i 2. runde var på straffer mot Kristiansund BK i 2008.
Brumunddal - Lillestrøm:
Dei møttest sist i 2. runde i 2010, med 6-1 til LSK som resultat. LSK rauk sist ut i 2. runde i 2008 mot Eidsvold Turn etter sjølvmål av keeper Otto Fredriksson.
Byåsen - Aalesund:
Møttest i Ålesund i 3. runde i 2012, med 4-0 til AaFK som resultat. Aalesund som eliteserielag er aldri slått ut i 1. eller 2. runde, men har tapt i 3. runde i fire av dei siste sju sesongane.
Finnsnes - Tromsø:
Tromsø vann i 2. runde på straffer i 2014. I 1. runde vann Tromsø 6-3 i 2011. Sist TIL tapte i 2. runde var mot Senja i 2015.
Vard - FK Haugesund:
Byrivalane møtest i cupen for fjerde gong sidan 2002, alle gongane med siger til FKH. Men det er berre to år sidan FKH tapte for Fyllingsdalen i 2. runde.
Skeid - Strømsgodset:
Gamle kjende som møtest for 37. gong (serie og cup). Men dei har ikkje spela mot kvarandre i cupen sidan 2000 då Godset van 2-0. Litt eldre fotballentusiastar vil mnnest 1-0 til Godset i Drammen i siste serierunde i 1970, eit resultat som gav seriegull til Strømsgodset og nedrykk for Skeid. Godset rauk ut i 2. runde både i 2009 og 2013.
Moss - Sarpsborg 08:
I 2. runde i 2012 vann Sarpsborg 6-1. Kjetil Berge og Morten Giæver spela for 08 då, no spelar dei i Moss. Sist Sarpsborg 08 tapte i 2. runde var for Kvik Halden i 2013.
Ørn-Horten - Sandefjord:
Dei møttest i 2. runde i 2004, då Sandefjord vann 4-2. Som eliteserielag rauk Sandefjord sist i 2. runde mot Ull/Kisa i 2009.
Pors - Odd:
Grenlands-naboane har møtt kvarandre mange gonger i cupen. Seinast i 2. runde i 2013 då Odd vann 2-1 etter ekstraomgangar.
SLAPP MED SKREKKEN: Even Hovland scorar for Molde, som vinn på straffer i 3. runde i 2013
Foto: Svein Ove Ekornesvåg, Svein Ove Ekornesvåg / NTB scanpixHødd - Molde:
Også gjengangarar i cupen. Sist møttest dei i 3. runde i 2013, då Molde utlikna på overtid i ordinær tid og vann på straffer. Sist Hødd vann var 1-0 i 2002. Molde har ikkje tapt i 2. runde sidan 1997, mot Stryn.
Kråkerøy - Vålerenga:
Ingen eliteserielag har gått på så mange cupsmellar som Vålerenga dei siste åra, med tap i 2. runde i 2010, 2011 og 2015. I 1974 blei dei slått 2-0 av nettopp Kråkerøy, som slo bynabo Fredrikstad i 1. runde i år.
Raufoss - Sogndal:
Ingen cup-møte i nyare tid.
Lysekloster - Brann:
Ingen cup-møte tidlegare. Brann tapte for Førde i 1. runde i fjor.
Verdal - Kristiansund:
Ingen cup-møte tidlegare.
Asker -Stabæk (torsdag):
Naboane frå Akershus-kommunane vest for Oslo møttest sist i 3. runde i 2012, med Asker-siger 2-1. Det er også siste gongen Stabæk er slått ut så tidleg.
Egersund - Viking (torsdag):
Tredje møte mellom desse laga sidan 2007, alle med Viking-siger. Egersund har ikkje scora mål i desse kampane, samla målskilnad er 0-13. Siste møte var i 2013 med 0-3 som resultat.
Og skulle cupsensasjonane utebli i denne omgang, er det ny runde allereie neste veke.
