I heile natt forhandla representantar frå 170 land i Kigali, hovudstaden i Rwanda. Gjennombrotet kom tidleg laurdag morgon.
– Dette betyr at ved slutten av århundret blir kloden ei halv grad mindre varm enn den elles ville blitt. Difor er dette ein uhyre viktig avtale for å oppfylle Paris-avtalen, seier klima- og miljøminister Vidar Helgesen.
Utanriksminister i USA John Kerry var med på forhandlingane i Kigali.
Foto: DAVE CLARK / AfpOgså utanriksministeren i USA gleda seg over resultatet.
– Dette er eit stort skritt framover, sa John Kerry.
Han har sjølv tatt del i forhandlingane og forsøkt å presse fram ein ambisiøs avtale.
Fyrste store avtale sidan Paris-møtet
HFK-gassane som er i bruk i kjøleanlegg, air condition-anlegg og fryseanlegg skal fasast ut og erstattast med andre gassar i løpet av dei neste tiåra.
Utrekningar viser at HFK-gassane kunne ha løfta temperaturen på kloden med 0,5 grader ved slutten av dette århundret viss ikkje noko var blitt gjort å avgrense bruken.
Fleire av deltakarane på møtet meiner landa no har vist at dei kan leve opp til sine forpliktingar.
– Dette er eit klart bodskap frå verdas leiarar om at den grøne endringa, som starta i Paris, er irreversibel og ustoppeleg, seier Erik Solheim, leiar for miljøprogrammet til FN (UNEP) til NTB.
Ikkje store konsekvensar i Norge
Men trass ein kollektiv klimaavtale vil ikkje nordmenn merke så mykje til avtalen.
– Vi aukar denne avgifta i neste års statsbudsjett, som ein del av det grøne skatteskiftet og vi er godt i gang, men det er i mange andre land, ikkje minst i dei store fremvekskande økonomiane der denne gassen er i stor vekst. Difor har det vore så viktig å få eit internasjonalt regime for å få slutt på bruken av den, seier ministeren til NRK.
Han legg til at HFK-gassane ikkje er den gassen som brukast mest, men den veks raskast, difor er det så viktig å få slutt på bruken av den.
